Maraicheriá, frutas e mèl — val del Duzou
Los Jardins del Duzou
Benvenguda als Jardins del Duzou. Vos vaquí al còr d’una pichona explotacion familiala situada dins la val del Duzou, entre Sant-Ciprian-sus-Dordon e Pruinas.
Installats dempuèi 2018, produsèm de liumes biologics, de frutas e de mèl sus un terren d’un ectara.
Çò que nos tira a còr
Trabalham a pichona escala, al ritme de las sasons.
Nòstra enveja es simpla : vos prepausar de frutas e liumes bio a de prètzes rasonables tot en limitant tant que possible nòstre impacte sus l’environament.
Privilegiam una comercializacion de proximitat, amb un ligam dirècte entre lo productor e lo consomator.
Nòstres produches
Segon las sasons, trobatz tota una gamma de liumes-fuèlhas, frutas e raices.
A la prima
La produccion comença en abril ambé los pesèls, las favas e las ensaladas, puèi las pastenagas, las cebas, las trufas novèlas, las bledaravas, las cogordetas e los rabanets pòrtan lor lòt de vitaminas.
En estiu
Començament de julhet, los liumes del solelh ! Tomatas, pebrons, augerinas, cocombres, mongetas, seguits de pròche per las perseguièras, prunas, peras, rasims, melons e pastècas.
En autom
Fin de setembre, entran dins la dança las cogordas, las pomas, las patanas doças e los caulets. La sason se perlonga puèi jos serra ambé los espinarcs, lentilhons e ensaladas.
Produches transformats
Quand las produccions son importantas, realizam de confituras de grosèlas, cassís, frambesas, de jus de frutas, e mai de colís de tomatas. Aqueles produches son realizats de manièra artesanala, amb de recèptas simplas inspiradas de las de nòstras menina. Per las confituras, lo solet ingredient apondut a las frutas es de sucre bio.
Nòstras contrentas
Segon las annadas, qualques produches son pas disponibles o ben en quantitat fòrça limitada. Aquò es degut a un problèma de produccion, çò que arriba sovent sus una tala diversitat de produches. Una gelada tardiva o tròp d’umiditat pòdon rapidament metre a mal qualques liumes e arbres frutièrs. Las canículas son tanben impactantas sus la produccion.
Productors partenaris
Per vos far descobrir los bons produches locals, de productritzes e productors partenaris pòdon prepausar aicí lors especialitats. La provenença vos serà ben especificada.
Cossí comandar al nòstre ?
Per demorar simple e pròche de vos, vos prepausam d’emplenar lo vòstre panièr ambé los produches de vòstra causida puèi de causir lo moment que vos conven lo melhor per lo recuperar.
Retirament a la bòria
La bòria es situada a 3 km de Sant-Ciprian. Per mai de flexibilitat, de nombroses oraris vos son prepausats.
Saint-Cyprien-sur-Dourdou
12320 Conques-en-Rouergue Voir sur Google Maps
Punts relais
De punts relais seràn mes en plaça dins la mesura ont ne exprimissetz lo besonh, sèm dobèrts a tota proposicion.
Cossí pagar ?
Mantun metòde de pagament vos son prepausats. Pagatz en moneda o per chèc al moment del retirament de vòstra comanda a la bòria, o ben amb Wero, virament bancari simplificat.
Pichona istòria del luòc
Situat dins la pichona val del Duzou, entre Pruinas e Sant-Ciprian, aqueste jardin nasquèt en 2018 a l’entorn de nòstre ostal.
D’en primièr, d’arbres e arbusses son estats plantats per crear un vergièr : poma, pera, pruna, persega, rasims de taula, cassís, frambesa. Totes son pas encara en produccion, mas ja de fòrça bonas confituras de frutas roges son realizadas.
De serras son estadas installadas progressivament ; nos permeton de prepausar de liumes primaires a la prima, de perlongar la sason en ivèrn e de metre a l’abric los liumes fragils coma las tomatas.
Una produccion certificada biologica
La certificacion en agricultura biologica, dempuèi 2020, s’es impausada per nosautres coma una evidéncia.
Nòstres metòdes de luta contra las malautiás e ravatges repausan d’en primièr sus l’utilizacion de decoccions de plantas coma la prèla, las ortigas o la falguièra. Permeton de fortificar las plantas o d’aluènhar los insèctes que volrián las devorar. Los produches fitosanitaris del comèrci, autorizats en agricultura biologica, son pas utilizats qu’en darrièr recors.
Per la fertilizacion naturala, utilizam de fems longament compostats, eissits de bòrias partenàrias, en particular la bòria de Recolas situada sus la comuna de Concas-en-Roergue, productritz de lach e de fromatge biologics.
Per lutar contra las èrbas fòlas, lo sarclatge e lo desèrbatge manual son de rigor, seguits d’un palhatge natural a basa de fen. Aqueste procès permet de protegir la tèrra tot en nodrissent los vèrms e insèctes que poblan lo sòl. Aquestes son los vertadièrs fertilizators.
Las abelhas an tanben trobat lor plaça dins lo jardin, son preciosas per lor ròtle de pollinizairas e demòran sus plaça tot l’an. Aiman particularament los cassissièrs, framboesièrs, cogordas, per las plantas cultivadas e las romecs, acàcias, trefles, pissalièits, castanhièrs per las plantas salvatjas. Recaptam lor mèl pas qu’un sol còp per an, a la fin del mes d’agost.
Aqueste mèl a un gost unic e armoniós, a l’encòp doç e aromatic, associa flors salvatjas e flors del òrt. Las proporcions de cada flor varian segon lo clima de l’annada. Mai l’annada es seca, mai lo mèl es corsat. Las abelhas, favorizadas per la biodiversitat, son tanben de bonas indicatritz sus l’estat de santat d’un mitan.
Nos engatjam a produsir una alimentacion sana tot en preservant e melhorant los sòls e la diversitat biologica del jardin.